ദുബായ്: – വേഗതയെ വെല്ലുവിളിച്ച് ദുബായ്മെട്രോ ബ്ലൂ ലൈൻ വരുന്നു:2024-ൽ നിർമ്മാണം ആരംഭിക്കും . ഇതോടെ ദുബായ് എയർപോർട്ട്, അക്കാദമിക് സിറ്റി, ദുബായ് സിലിക്കൺ ഒയാസിസ് തുടങ്ങിയ പ്രധാന പ്രദേശങ്ങളിൽ 30 മിനിറ്റിനുള്ളിൽ എത്തിച്ചേരാനാവും.ദുബായിലെ റോഡ്‌സ് ആൻഡ് ട്രാൻസ്‌പോർട്ട് അതോറിറ്റിയുടെ (ആർടിഎ) ഈ പുതിയ ലൈൻ നിങ്ങളുടെ പൊതുഗതാഗത അനുഭവം എങ്ങനെ എളുപ്പമാക്കും എന്നതിനെക്കുറിച്ച് നിങ്ങൾ അറിയേണ്ടതെല്ലാം ഇതാ.
എന്താണ് ദുബായ് മെട്രോ ബ്ലൂ ലൈൻ?
ബ്ലൂ ലൈൻ ദുബായ് മെട്രോ നെറ്റ്‌വർക്കിലെ മൂന്നാമത്തെ ലൈനാണ്, 30 കിലോമീറ്റർ ദൈർഘ്യമുള്ള പാതയിൽ 14 സ്റ്റേഷനുകൾ ഉൾപ്പെടുന്നു.ദുബായ് മെട്രോ ബ്ലൂ ലൈൻ പദ്ധതിക്ക് 2024 തുടക്കം കുറിക്കുമെന്ന് ആർടിഎ എക്‌സിക്യൂട്ടീവ് ഡയറക്‌ടേഴ്‌സ് ബോർഡ് ചെയർമാനുമായ മത്തർ അൽ തായർ പറഞ്ഞു.
18 ബില്യൺ ദിർഹത്തിൻ്റെ ബ്ലൂ ലൈൻ പദ്ധതിക്ക് കഴിഞ്ഞ വർഷം നവംബറിലാണ് അംഗീകാരം ലഭിച്ചത് , ഇത് പൂർത്തിയായാൽ നഗരത്തിലെ പ്രധാന പ്രദേശങ്ങളെ ദുബായ് അന്താരാഷ്ട്ര വിമാനത്താവളവുമായി ബന്ധിപ്പിക്കും.ഇത് ഗതാഗതക്കുരുക്ക് 20 ശതമാനം കുറയ്ക്കുമെന്നും സ്‌റ്റേഷനുകൾക്ക് സമീപമുള്ള ഭൂമിയുടെയും വസ്തുവകകളുടെയും മൂല്യം 25 ശതമാനം വരെ ഉയരുമെന്നും പ്രതീക്ഷിക്കുന്നതായി ആർടിഎ പറയുന്നു.ദുബായ് മെട്രോയുടെ 20-ാം വാർഷികത്തോടനുബന്ധിച്ച് 2029-ൽ പദ്ധതി പൂർത്തീകരിക്കാനാണ് ലക്ഷ്യമിടുന്നത്.
പുതിയ റൂട്ട്?
ദുബായ് ഇൻ്റർനാഷണൽ എയർപോർട്ടും ഈ ഒമ്പത് പ്രധാന മേഖലകളും തമ്മിൽ ബ്ലൂ ലൈൻ നേരിട്ട് കണക്ഷൻ നൽകും:
1. മിർദിഫ്
2. അൽ വർഖ
3. ഇൻ്റർനാഷണൽ സിറ്റി 1
4. ഇൻ്റർനാഷണൽ സിറ്റി 2
5. ദുബായ് സിലിക്കൺ ഒയാസിസ്
6. അക്കാദമിക് സിറ്റി
7. റാസ് അൽ ഖോർ ഇൻഡസ്ട്രിയൽ ഏരിയ
8. ദുബായ് ക്രീക്ക് ഹാർബർ
9. ദുബായ് ഫെസ്റ്റിവൽ സിറ്റി
ഒമ്പത് എലവേറ്റഡ് സ്റ്റേഷനുകളും അഞ്ച് ഭൂഗർഭ സ്റ്റേഷനുകളും ഉൾപ്പെടെ ആകെ 14 സ്റ്റേഷനുകളാണ് ഈ റൂട്ടിൽ ഉണ്ടാവുക . ബ്ലൂ ലൈനിൽ നിന്നുള്ള ട്രെയിനുകൾ ദുബായ് ക്രീക്കിന് മുകളിലൂടെ 1,300 മീറ്റർ വഴി കടന്നുപോകും.
ബ്ലൂ ലൈൻ പൂർത്തിയാകുന്നതോടെ മെട്രോ, ട്രാം സ്റ്റേഷനുകളുടെ എണ്ണം 64ൽ നിന്ന് 78 ആയി ഉയരും.
