തിരു:കേരളത്തിൽ ഇന്ന് ഉച്ചയോടെ ശക്തമായ കാറ്റും ഇടിമിന്നലും: നാല് ദിവസം മഴയ്ക്ക് സാധ്യത.സംസ്ഥാനത്ത് ഇന്നും ഒറ്റപ്പെട്ട ഇടങ്ങളില് മഴയ്ക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. തെക്കന് കേരളത്തിലും മധ്യകേരളത്തിലുമാണ് കൂടുതല് മഴയ്ക്ക് സാധ്യത. വടക്കന് കേരളത്തില് കാര്യമായ മഴയ്ക്ക് സാധ്യതയില്ല.
ഉച്ചയോടെ ശക്തമായ കാറ്റോടും ഇടിമിന്നലോടും കൂടിയ മഴയ്ക്ക് സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ബംഗാള് ഉള്ക്കടലില് നിന്നുള്ള ഈര്പ്പം ഏറിയ കാറ്റും ആന്ഡമാന് കടലില് രൂപപ്പെടുന്ന ന്യൂനമര്ദ്ദവുമാണ് ശക്തമായ മഴയ്ക്ക് കാരണം. ഏപ്രില് എട്ടാം തീയതി വരെ സംസ്ഥാനത്ത് ഇടിമിന്നലോട് കൂടിയ ഒറ്റപ്പെട്ട മഴയ്ക്ക് സാധ്യതയുണ്ട്. കഴിഞ്ഞ ദിവസം തിരുവനന്തപുരത്ത് മഴ ശക്തമായിരുന്നു. ശക്തമായ കാറ്റിലും മഴയിലും പലയിടങ്ങളിലും കനത്ത നാശ നഷ്ടവും റിപ്പോര്ട്ട് ചെയ്തിട്ടുണ്ട്.
ബംഗാള് ഉള്ക്കടലില് ആന്ഡമാന് കടലിന് മുകളിലായി ഇന്ന് ചക്രവാതച്ചുഴി രൂപപ്പെടുമെന്നാണ് പ്രതീക്ഷിക്കുന്നത്. തുടര്ന്നുള്ള 24 മണിക്കൂറിനുള്ളില് ഇത് ന്യൂനമര്ദ്ദമായി മാറും. ചക്രവാതച്ചുഴി ന്യൂനമര്ദ്ദമായി മാറുന്നതിന്റെ ഫലമായി തെക്ക് പടിഞ്ഞാറന് ബംഗാള് ഉള്ക്കടലില് ശക്തമായ കാറ്റിന് സാധ്യതയുണ്ട്. മോശം കാലാവസ്ഥയ്ക്ക് സാധ്യതയുള്ളതിനാല് മത്സ്യതൊഴിലാളികള് ജാഗ്രത പാലിക്കണം.
മത്സ്യത്തൊഴിലാളി ജാഗ്രതാ നിര്ദ്ദേശം
06-04-2022: തെക്ക് കിഴക്കന് ബംഗാള് ഉള്ക്കടലിലും അതിനോട്ചേര്ന്നുള്ള തെക്ക് ആന്ഡമാന് കടലിലും മണിക്കൂറില് 40-50 കിലോമീറ്റര് വേഗത്തിലും ചില അവസരങ്ങളില് 60 കിലോമീറ്റര് വരെ വേഗത്തില് ശക്തമായ കാറ്റിനും മോശം കാലാവസ്ഥയ്ക്കും സാധ്യത.
07-04-2022: തെക്ക് കിഴക്കന് ബംഗാള് ഉള്ക്കടലില് മണിക്കൂറില് 45-55 കിലോമീറ്റര് വേഗത്തിലും ചില അവസരങ്ങളില് 65 കിലോമീറ്റര് വരെ വേഗത്തില് ശക്തമായ കാറ്റിനും മോശം കാലാവസ്ഥയ്ക്കും സാധ്യത.
08-04-2022: ബംഗാള് ഉള്ക്കടലിന്റെ തെക്ക് പടിഞ്ഞാറന് സമുദ്രഭാഗങ്ങളിലും, അതിനോട് ചേര്ന്നുള്ള തെക്ക് കിഴക്കന് സമുദ്രഭാഗങ്ങളിലും മണിക്കൂറില് 50-60 കിലോമീറ്റര് വേഗത്തിലും ചില അവസരങ്ങളില് 70 കിലോമീറ്റര് വരെ വേഗത്തില് ശക്തമായ കാറ്റിനും മോശം കാലാവസ്ഥയ്ക്കും സാധ്യത.